उसवलेला बाप...

-
आईसारखा नऊ महिने
नसेलही वाढवत पोटात तो
पण ICU च्या बाहेर ओंजळीत तोंड खुपसून बसलेला बाप पाहिलाय का..?
        तुम्ही कधी उसवलेला बाप पाहिलाय का..??

चिऊ काऊ म्हणून घास भरवायला
नसेलही वेळ भेटत त्याला
पण त्याच बाळाच्या भविष्यासाठी
दिवसरात्र काम करणारा बाप पाहिलाय का..?
        तुम्ही कधी उसवलेला बाप पाहिलाय का..??

गोष्टींमध्ये ऐकल्यासारखा
नसेलही अंघोळीच्या साबणाने दाढी करत
पण कॉलेजची फी भरताना पैसे उसणे मागणारा बाप पाहिलाय का..?
        तुम्ही कधी उसवलेला बाप पाहिलाय का..??

एरवी राकट आणि अरसिक
वाटतही असेल स्वभाव त्याचा
पण त्यानेच लिहिलेल्या जुन्या कविता
आवडीने वाचणारा बाप पाहिलाय का..?
        तुम्ही कधी उसवलेला बाप पाहिलाय का..??

कमी मार्क्स मिळाले म्हणून
ओरडलाही असेल कितीदा तुमच्यावर
पण तुमच्या admission च्या tension ने
रात्रभर येरझरे घालणारा बाप पाहिलाय का..?
        तुम्ही कधी उसवलेला बाप पाहिलाय का..??

त्याच्या मनात असलेलं प्रेम
नसेलही दाखवत कदाचीत तो
पण मुलीच्या लग्नात
धुमसून धुमसून रडणारा बाप पाहिलाय का..?
        तुम्ही कधी उसवलेला बाप पाहिलाय का..??

आयुष्यभर कठीण आणि कणखर
वाटतही असेल तो तुम्हाला
पण वृद्धाश्रमात बसलेला
लाचार बाप कधी पाहिलाय का..?
        तुम्ही कधी उसवलेला बाप पाहिलाय का..??

                                   -प्रतीक कुंडलीक शिंदे (२७ मार्च २०१८)
                                      www.facebook.com/pratik780
                                      www.facebook.com/PatrickWritesLife
                                      www.twitter.com/patrick0780
                                      www.instagram.com/patrick.writes

Comments

Post a Comment

Popular posts from this blog

मने जुळली नाहीत म्हणून..

-
  मने जुळली नाहीत म्हणून शब्द जुळवण्याचा प्रयत्न करत आहे पण आजकाल ते ही एकमेकांशी जुळत नाहीत कदाचीत त्यांनाही अहंकार आड येत असावा... काही शब्द बोल्ड आहेत ठाम आहेत त्यांच्या विचारांवर तर काही आहेत इटॅलिक स्वच्छंदी, प्रवाहानुसार बदलणारे आणि अंडरलाईन मात्र दोघांना हवीय स्वतःच महत्व अधोरेखीत करण्यासाठी पण त्यांच्या या खेळात कविता मात्र भरकटलीय ... काही शब्द कर्सिव्ह इंग्लिश आहेत त्यांची सामाजिक किंमत जास्त आहे तर काही आहेत मराठी देवनागरी लिपीतील आपलेपणा ठासून भरलेला आहे त्यांच्यात पण त्यांच्या मिलनात काहीतरी मिसिंग वाटते नैसर्गिकपणा नसल्यावर गोष्टी निर्जीव वाटायला लागतात ... काही शब्द सरळ आहेत, ना काना ना मात्रा पण त्यांना त्याची पर्वा नाही तर काही शब्द आहेत, वेलांटी आणि उकारयुक्त पण त्यांना आस लागलीय जोडशब्द बनण्याची अशा वेळी त्यांच्या एकत्र येण्याने, व्याकरण मात्र फिकं पडतंय ... काही शब्द नामें आहेत स्वतःची ओळख त्यांनी जपली आहे तर काही शब्द ही सर्वनामे आहेत अवलंबून तर रहावं लागतं त्यांना नामांवरच पण त्यांच्या सोबत बसायला मात्र त्यांना जागा नाही ... - आशिष दहातोंडे (२६ जानेवारी २०१९)
Read more

मी बुद्ध आहे काळोखाचा

-
मी बुद्ध आहे काळोखाचा अज्ञानातील सुख माझ्या नशिबी नाही कळत नकळत अनेक मनं दुखावलीत माझ्या अश्रूंची कर्ज दुसऱ्यांनी चुकवलीत भूतकाळातल्या चुका दुरुस्त करायला भविष्याचा वेध घेतोय भविष्याची चिंता भूतकाळातल्या आठवणींमध्ये विसरतोय वर्तमानामध्ये मी जगत नाही... स्वप्नांना प्रश्न विचारून निरुत्तर केलय संथपणे विचारांचा रवंथ करून स्वप्नांना तिलांजली वाहिलीय अनेक कविता मनामध्ये विरून श्रेष्ठत्वाला पावल्या आज तिला कागदावर उतरवून तिचीपण किंमत कमी करतोय कडवी जुळवण्याची आता इच्छा होत नाही कविता आणि आयुष्याचं यमक जुळवण्याची तसदी मी आता घेत नाही आयुष्याच्या तुटलेल्या आरशावर स्वतःची अनेक प्रतिबिंबे दिसतात त्यातलं खरं प्रतिबिंब कोणतं, हेच आता कळत नाही... - आशिष दहातोंडे (रावण)
Read more